रोल्पा — त्रिवेणी गाउँपालिका–७ खर्कमा हिजो परेको असिनाले स्थानीय किसानका तरकारी बालीमा ठूलो क्षति पुर्याएको छ। असिनाबाट करिब १ करोड २८ लाख रुपैयाँ बराबरको क्षति भएको प्रारम्भिक अनुमान गरिएको छ। त्रिवेणी गाउँपालिकाका कृषि प्राविधिक र वडा नम्बर ७ का कृषि प्राविधिकको टोली सम्बन्धित ठाउँमै गएर किसानहरूको के कति क्षति भयो भनेर अवलोकन गरेको छ। कृषि प्राविधिकको अनुसार कति नोक्सानी भयो भनेर एकिङ्को साथ भन्न नसकिने बताएका छन्। सम्पूर्ण क्षति तरकारीहरूको डाटा सङ्कलन गरेको कारण अहिले नै यति नै भयो भनेर भन्न नसकिने तर आइतबारसम्म कति नोक्सानी भएको भनेर जानकारी दिने कृषि प्राविधिकले बताएका छन्।
प्रभावित बालीहरूमा मुख्यतः बन्दा, टमाटर, गोलभेंडा, काउली, साग तथा केही बाँकी गहुँ लगायतका तरकारी बालीहरू रहेका छन्। मौसम अनुकूल भई राम्रो उत्पादन हुने आशामा रहेका किसानहरू असिना पानीका कारण बाली सखाप भएपछि गहिरो आर्थिक संकटमा परेका छन्।
चिरेखोला उत्पादक कृषक समूहका अध्यक्ष हेमन्त बुढाथोकीका अनुसार खर्क गाउँमा करिब २५ घरधुरी छन्, जहाँ प्रायः सबैले तरकारी खेतीमा आश्रित छन्। “यहाँका अधिकांश किसानको मुख्य आयस्रोत तरकारी खेती हो,” बुढाथोकीले भन्नुभयो, “तर बैशाखको महिनामै परेको असिना पानीले सबै बाली सखाप पारेपछि किसानहरू अत्यन्त चिन्तित छन्।”
स्थानीय सरकारले क्षतिको मूल्यांकन गरी प्रभावित किसानलाई राहत र सहयोगका कार्यक्रम ल्याउने अपेक्षा गरिएको छ।
