रोल्पा — रोल्पाको परिवर्तन गाउँपालिका–३ बागमारा स्थित पाछावाङ खोलामा शंकास्पद सकेट बम फेला परेको छ।
आज बिहान करिब १० बजेतिर खोलामा जाली बाँध्ने उद्देश्यले जेसीबीमार्फत जग खन्ने क्रममा फलामको सकेट जस्तो देखिने र त्यसबाट दुई वटा तार निस्किएको वस्तु भेटिएको हो। स्थानीय जानकारहरूले उक्त वस्तु सकेट बम हुन सक्ने बताएका छन्।
घटनाबारे जानकारी प्राप्त हुनासाथ प्रहरी चौकी बागमाराबाट प्रहरी सहायक निरीक्षकको कमाण्डमा तीन जनाको टोली घटनास्थल पुगेको थियो। प्रहरी टोलीले प्रारम्भिक निरीक्षण गर्दा वस्तु शंकास्पद देखिएकाले आसपासको क्षेत्रलाई सिल गर्दै सर्वसाधारणलाई नजिक जान निषेध गरिएको जनाएको छ।
प्रहरीले नेपाली सेनाको बम डिस्पोजल टोलीलाई समेत जानकारी गराइएको र थप सुरक्षा सतर्कता अपनाइएको जनाएको छ।
रोल्पामा तत्कालीन जनयुद्धका बेला लुकाइएका विस्फोटक पदार्थका कारण विगतमा पटक–पटक मानवीय क्षति हुँदै आएको छ। केही वर्षअघि रोल्पाको त्रिवेणी गाउँपालिकामा यस्तै विस्फोटक पदार्थ पड्किँदा दुई बालबालिकाको ज्यान गएको थियो।
आज पनि समयमै सतर्क नभएको भए अप्रिय घटना हुन सक्थ्यो ।
