रुपन्देही, बुटवल — रुपन्देहीको बुटवल उपमहानगरपालिका–११ स्थित होराइजनचोकको मिलिजुली पथमा एकै परिवारका तीन जनाको विभत्स हत्या भएको छ। ३४ वर्षीया दीपा बस्याल र उनका दुई सन्तान—चार र सात वर्षकी छोरीहरू—बुधबार बिहान घरमै मृत अवस्थामा फेला परेका छन्।
घटनाबारे जानकारी दिँदै जिल्ला प्रहरी कार्यालय रुपन्देहीका प्रवक्ता डीएसपी सुरज कार्कीले पूर्व श्रीमान सुजन कोइरालाले बिहान करिब ४ बजेतिर आफ्नै घरमा बोलाएर तीनै जनाको हत्या गरेको प्रारम्भिक अनुसन्धानबाट खुलेको बताए। उनका अनुसार हत्यामा घरेलु हतियार हेम्बर र धारिलो चक्कुको प्रयोग गरिएको थियो।
दीपा बस्यालको केही समयअघि सुजनसँग सम्बन्ध विच्छेद भएको थियो। त्यसपछि उनले अर्कैसँग विवाह गरेर गएकी थिइन्। घटनाको दिन सुजनले दीपालाई छलकपटपूर्वक घरमा बोलाएर यस्तो आपराधिक कार्य गरेको प्रहरीको भनाइ छ।
अझ चकित बनाउने तथ्य के छ भने हत्या अभियोगमा पक्राउ परेका सुजन कोइरालाले यसअघि पनि जघन्य अपराध गरेका थिए। प्रहरीका अनुसार उनले केही वर्षअघि आफ्नै दाजुको हत्या गरेर जेल सजाय भोगेका थिए। तर संविधान दिवसको अवसरमा आममाफी पाएपछि उनी कारागारमुक्त भएका थिए।
हाल सुजन कोइराला प्रहरी नियन्त्रणमा छन् र घटनासम्बन्धी थप अनुसन्धान जारी रहेको प्रहरीले जनाएको छ।
