रोल्पाको त्रिवेणी गाउँपालिका-५ स्थित नव नेपाल क्याम्पसमा स्ववियु निर्वाचनको क्रममा एकै घरका दुई दाजुबहिनी निर्विरोध निर्वाचित भएका छन्। अनेरास्ववियुबाट प्रतिस्पर्धा गरेका उनीहरू बिना प्रतिद्वन्द्वी चयन भएका हुन्।
दाजु एकराज केसी र बहिनी राधिका केसी दुबै नव नेपाल क्याम्पसमा ब्याचलर प्रथम वर्षमा अध्ययनरत छन्। एकराज १८ वर्षका छन् भने राधिका १७ वर्षकी छन्। स्ववियुमा एकराज केसी सभापति पदमा निर्विरोध विजयी भएका छन् भने राधिका केसी सदस्य पदमा निर्वाचित भएकी छन्। उनीहरू खर्क बहादुर केसी र दीपा कुमारी केसीका कान्छा छोरा र कान्छी छोरी हुन्।
उनीहरू दुई दाजु-बहिनी बाहेक बाँकी नव नेपाल क्याम्पसमा अखिल क्रान्तिकारीबाट सचिव, कोषाध्यक्ष लगायत ९ जना निर्वाचित भएका छन् । नवनिर्वाचित टिमले विद्यार्थी हकहित संरक्षण र क्याम्पसको विकासका लागि समर्पित भएर कार्य गर्ने प्रतिबद्धता जनाएको छ।
