रोल्पा । नेकपा (माओवादी केन्द्र)का उपमहासचिव वर्षमान पुन अनन्तले रवि लामिछानेमाथि जे गरिएको छ , धनराजलाई र ऋषिकेश पोखरेललाई पनि त्यही हुनुपर्ने बताएका छन् ।
पार्टी सम्वद्ध पत्रकारको संगठन प्रेस सेन्टरले गृह जिल्ला रोल्पाको लिवाङमा शनिबार गरेको पत्रकार भेटघाटमा पुनले धनराज र ऋषिकेश सत्तारुढ दलका नेता भएकै कारण उन्मुक्ति दिन खोजिएको भए जनताले प्रतिवाद गर्ने चेतावनी दिए ।
´राज्यका नियकाले गर्ने न्याय सम्पादन र अनुसन्धान सत्तापक्ष, प्रतिपक्ष वा पहुँच भएको र नभएको आधारमा नभई निष्पक्ष हुनुपर्ने ` उनले भने । ‘रवि लामिछानेलाई जस्तै आरोप काँग्रेसका उपसभापति धनराज गुरुङजी र प्रधानमन्त्रीको दलका सांसद र लेखा समितिका सभापति ऋषिकेश पोखरेलजीलाई पनि छ’, पुनले भने, ‘यसमा दोहोरो नहोस् । रवि लामिछानेमाथि जे गरिएको छ , धनराजलाई पनि त्यही होस् । प्रधानमन्त्रको पार्टीका सांसद् पोेखरेल जी माथि १८ करोड हिनामिना गरेको आरोप छ । उहाँहरु सत्तापक्षमा भएकाले छानबिन गर्नु नपर्ने, त्यस्तै आरोप लागेका रवि लामिछाने प्रतिपक्षी दलको सभापति भएकाले पक्राउ गरेर थुन्नुपर्छ भन्ने हो भने त्यो प्रतिशोध हुन्छ ।
एमाले अध्यक्षसमेत रहेका प्रधानमन्त्री केपी ओलीले एउटा व्यक्तिबाट अर्ब चन्दा लिनुको कारण के हो ? पार्टीले जवाफ दिनुपर्ने हुन्छ। साढे ५ लाख सदस्य भएको पार्टी एमालेले किन र के कारणले चन्दा लिने हो ? एमालेका लाखौं कार्यकर्ताले पनि प्रश्न सोध्नुपर्छ,’ पुनको प्रश्न छ। उनले अघिल्लो सरकारले गरेका राम्रा काम र योजनाको विरोध नगर्न उनले वर्तमान सरकारसँग आग्रह गरे तर उनले प्रमुख प्रतिपक्षी दलका रूपमा दत्तचित्त भएर संसदमा उपस्थिति जनाउने उनको प्रतिबद्धता छ।
