काठमाडौँ —प्रमुख प्रतिपक्षी दल माओवादी केन्द्रका अध्यक्ष पुष्पकमल दाहालले सेना समायोजन गर्दा राजनीतिक नेतृत्वले ठुलो जोखिम उठाएको बताएका छन् ।
प्रतिनिधिसभाको बुधबारको बैठकमा संक्रमणकालीन न्यायसँग सम्बन्धित विधेयकका विषयमा आफ्नो धारणा राख्दै राजनीतिक नेतृत्वले ठुलो जोखिम उठाएर सेना समायोजन गरेको बताएका हुन् । नेपालको हतियार व्यवस्थापन र सेना समायोजन सरल र सहज ढंगले भएको पनि स्मरण गरेका छन् ।
शान्ति प्रक्रिया थालनीका मूलभूत दुई पक्ष सफल भएका पनि दाहालको भनाइ थियो । ‘राजनीतिक रूपमा राजतन्त्रात्मक निरंकुश व्यवस्थाको अन्त्य गरी संघीय लोकतान्त्रिक गणतन्त्रतात्मक व्यवस्था स्थापना भएको छ भने संविधान सभा बाट नयाँ संविधान बनि नयाँ संविधानमा राजनीतिक उपलब्धिहरू संस्थागत पनि भएका छन्,’ उनले भने ।
