कात्तिक २५, काठमाडौं । बाल साहित्यकार शान्ति सापकोटाको किशोर कथासङ्ग्रह ‘मङ्की माइन्ड’ विमोचन गरिएको छ ।
शनिबार बिहान काठमाडौँमा आयोजित एक कार्यक्रमका बीच सापकोटाको कृति ‘मङ्की माइन्ड’ विमोचन गरिएको हो ।
नेपाल प्रज्ञाप्रतिष्ठानका प्राज्ञ डा. कौशिला रिसाल, प्राज्ञ त्रैलोक्यमान वनेपाली, बाल वाङ्मय तथा अनुसन्धान केन्द्रका अध्यक्ष अनन्त वाग्ले, नेपाल ललितकला प्रज्ञाप्रतिष्ठानका निवर्तमान कूलपति के.के. कर्माचार्य, तारानिधि भट्टराई, केशरी अम्गाई लगायतले कृतिको बिमोचन गरे ।
बाल वाङ्मय तथा अनुसन्धान केन्द्रको आयोजनामा भएको कार्यक्रममा प्राज्ञ डा. रिसालले किशोर, किशोरीका समस्याका बारेमा साहित्य मार्फत अझै धेरै उजागर हुनुपर्ने आवश्यकता औल्याइन् । बाल तथा किशोर साहित्यको प्रवद्र्धनको लागि आफूले सक्दो सहयोग गर्ने प्रतिवद्धता पनि उनले व्यक्त गरिन् ।
नेपालमा पर्याप्त मात्रामा किशोर साहित्यको लेखन नभइरहेको अवस्थामा ‘मङ्की माइन्ड’ ले थोरै भएपनि किशोर साहित्य लेखनको अभाव पूर्ति गरेको उनको भनाइ थियो ।
पुस्तकमाथि किशोरी तपस्या वाग्लेले विस्तृत समीक्षा गरेकी थिइन् । यसैगरी तारानिधि भट्टराई, केशरी अम्गाईले पनि पुस्तकको बारेमा समीक्षात्मक मन्तव्य राखेका थिए । सिर्जना शर्मा, के.के. कर्माचार्य लगायतले कृतिलाइ शुभकामना दिएका थिए ।
कृतिकार शान्ति सापकोटाले पुस्तक लेखनको औचित्यका बारेमा स्पष्ट पारेकी थिइन् । कार्यक्रमका वक्ताहरुले किशोर साहित्य अत्यावश्यक रहेको र यो अभियानकै रुपमा चलाउनु पर्ने उल्लेख गरे । साझा प्रकाशनले प्रकाशनमा ल्याएको यो कृतिमा १० कथा सङ्ग्रहित रहेका छन् ।
