रोल्पाको सुनछहरी गाउँपालिकाको गाम खोला क्षेत्रमा बोलेरो दुर्घटना हुँदा दुई जना विद्यार्थीको मृत्यु र ९ जना घाइते भएका छन ्।
गए राति करिब १० बजेको समयमा सेरमबाट सिउरीतर्फ जाँदै गरेको ग १ ज ६६६६ नम्बरको बोलेरो जिप आफैँ अनियन्त्रित भई सडकमै पल्टिँदा दुर्घटना भएको जनाइएको छ।
नेपाल राष्ट्रिय माध्यमिक विद्यालयका विद्यार्थी बोकेको उक्त दुर्घटनामा पर्दा जिपमा सवार ११ जना घाइते भएका थिए । घाइते सबैलाई तत्काल उपचारका लागि प्राथमिक स्वास्थ्य केन्द्र सुलिचौर, पठाइएको थियो ।
इलाका प्रहरी कार्यालय पोवाङ, रोल्पाले खबर प्राप्त हुनासाथ ६ जनाको प्रहरी टोली घटनास्थलमा खटाएको थियो । उपचारकै क्रममा मिति आज विहान घाइतेमध्ये सुनिल वि.क. र दिपा पुन लाई चिकित्सकले मृत घोषणा गरेका छन् ।
अन्य घाइतेहरूमा हिमाल वि.क., अमृता पुन, जमुना वि.क., अस्मिता वि.क., पवित्रा पुन, शनि वि.क., विपना घर्तीमगर, किसन घर्तीमगर र हस्तिरा वि.क. रहेका छन्। उनीहरूको प्राथमिक स्वास्थ्य केन्द्र सुलिचौरमा उपचार भइरहेको प्रहरीले जनाएको छ । सुलिचौरबाट पनि थप उपचारका लागी बाहिरी जिल्ला पठाएको छ।
जिप चालक हाल प्रहरीको नियन्त्रणमा रहेका छन् भने दुर्घटनाबारे थप अनुसन्धान भइरहेको प्रहरीले जानकारी दिएको छ ।
