काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले शिक्षकहरू माथि बेइमानी हुन नदिने बताएका छन्।
सहिद शिक्षक स्मृति केन्द्रमा बहुउद्देश्यीय भवनको उद्घाटन गर्दै शिक्षक आन्दोलन, शिक्षा विधेयक र हालको राजनीतिक परिदृश्यबारे जानकारी गराए।
उनले भने, ‘तपाईँ लाखौँ आएर आन्दोलन गर्नुभयो। तर सरकारले अझै जालझेल गर्न खोज्दैछ। तर यो मुद्दा सरकारले जालझेल गरेर रोकिराख्न सक्दैन। तपाईँहरूले सोचेजस्तो सबै नहुनसक्ला तर भलै हामीले संविधानमा अगाडि जाने ढोका खुला गरेर सम्झौता गरेकै हो। त्यस्तो हुनसक्ला। तर, शिक्षकहरूलाई पूरै बेइमानी र धोखा हुन दिइनेछैन।’
शिक्षकहरूले सडकमा आउनु नपर्ने अवस्था संविधानले नै सुनिश्चित गरेको भएपनि त्यसअनुसार कार्यान्वयन नगर्दा आन्दोलन गर्न बाध्य भएको उल्लेख गरे।
पछिल्लो पटक आफू नेतृत्वको सरकारले शिक्षकहरूसँग गरेको सहमति कार्यान्वयन गर्न तत्परता नदेखाएको भन्दै असन्तोष व्यक्त गरे।
उनले भने, ‘सरकार तयार नभएपछि तपाईँहरू (शिक्षकहरू) सडकमा रहनुपर्यो, आन्दोलनमा हुनु भयो। तर सरकारको नेतृत्वबाट अपमानजनक व्यवहार भयो।’
