Day: २३ असार २०८१ २१:३६

– भारतको सिलोङमा चारजना नेपालीको हत्या गरिएको छ ।  मेघालय राज्य अन्तर्गत सुत्ंगा, जयन्तिया हिल्समा उनीहरूकाे बीभत्स हत्या भएको हो । पहिला बाँधेर त्यसपछि धारिलो हतियार प्रयोग गरेर हत्या गरेको देखिएको भारतीय सञ्चार माध्यमहरूले उल्लेख गरेका छन् । घटना भएको स्थान मेघालयको राजधानी शिलोङबाट १३० किलोमिटर टाढा भएको बताइएको छ । मारिने ४ जना ईलाम, धरान र भोजपुरका नेपाली भएको प्रारम्भिक सूचना छ । ती मध्ये एक जना ईलामका रवि राई रहेकाे समाचारमा उल्लेख छ । ४ जना नै स्थानीय कोइला खानीमा काम गर्दै आएका बताइएको छ । यो घटनाबारे दिल्लीस्थित नेपाली दूतावासलाई जानकारी पुगेको खबर आएको छ ।

काभ्रेपलान्चोकको भ्याकुरे खोलामा आएको बाढीले बगाउँदा दुई जनाको मृत्यु भएको छ । निरन्तरको अविरल वर्षापछि शनिबार दिउँसो आएको बाढीले बगाएर रोशी गाउँपालिका–११ भिमखोरीकी ६५ वर्षीय जालमाया रुचाल मगर र ५ वर्षकी सेतिमाया रुचाल मगरको मृत्यु भएको प्रहरीले जनाएकाे छ । काभ्रेपलान्चोकका विभिन्न खाेलामा शनिबार बाढी आउँदा जनधनकाे क्षति पुर्याएकाे छ । आसपासका नागरिकलाई सर्तकता अपनाउन अनुरोध गरिएको छ ।