काठमाडौं– नेकपा (बहुमत)का महासचिव धर्मेन्द्र बास्तोला (कञ्चन)ले दुई पोलिटब्युरो सदस्यसहित सातजना केन्द्रीय सदस्यको कारबाही फुकुवा गरेका छन् ।
बास्तोलाले सोमबार एक परिपत्र जारी गर्दै यसअघि कारबाहीमा परेका नेताहरूलाई तोकिएको जिम्मेवारीमा फर्किन सर्कुलर पठाएर निर्देशन दिएका छन् ।
यही साउन १४ गते पार्टीको केन्द्रीय समितिको तेस्रो पूर्ण बैठक बसिरहेको अवस्थामा होहल्ला तथा अस्वभाविक अवस्था सिर्जना गरेको भन्दै नेकपा बहुमतले पोलिटब्युरो सदस्य पूर्ण बिक र केन्द्रीय सदस्य शरद रसाइलीलाई पार्टीको साधारण सदस्यता समेत नरहने गरी निष्काशन गरेको थियो ।
यस्तै पोलिटब्युरो सदस्य सागर लिम्बू, केन्द्रीय सदस्यहरू हरि श्रेष्ठ, कृष्ण शाह, नेत्र रानाभाट, दर्शन नेपाली, बद्री अधिकारी र विक्रम पौडेललाई अनिश्चित कालका लागि निलम्बन गरिएको थियो ।
उनीहरूलाई अराजकता र अनुशासन हीनता प्रदर्शन गर्दै हुलदङ्गा, नाराबाजी र कुटपिटमा संलग्न भएको आरोप लगाइएको थियो । बैठककै क्रममा पक्ष विपक्षमा कुटाकुट र कालोमोसो दल्ने काम समेत भएको थियो ।
नेताहरूलाई कारबाही गरिएपछि त्यसको पक्ष र विपक्षमा पार्टीमा दुई धार देखा परेको थियो । ९८ जना केन्द्रीय सदस्य रहेको बहुमत पार्टीका ६४ जना बढी सदस्यले उक्त कारबाही गलत भएको भन्दै कारबाही फिर्ता नलिए पार्टी फुट्ने धम्की समेत दिएका थिए ।
३२ जना केन्द्रीय सदस्यले सामूहिक हस्ताक्षर गर्दै सार्वजनिक वक्तव्य नै जारी गरेर कारबाही फिर्ता लिन माग गरेका थिए भने पार्टीका ९ वटा जनवर्गीय सङ्गठनले समेत कारबाही फिर्ता हुनुपर्ने अडान लिएका थिए ।
