नेकपा ( माओवादी केन्द्र )का अध्यक्ष पुष्पकमल दाहाल ‘प्रचण्ड’ ले “म अहिलेसम्म जीवित रहेँ, एकपटक फेरि क्रान्ति गर्छु” भनी भावुक प्रतिबद्धता व्यक्त गरेका छन् ।
आज पार्टी केन्द्रीय कार्यालय पेरिसडाँडामा शहीदहरूको स्मरण गर्दै उनले प्रतिक्रियावादी शक्तिहरूले षड्यन्त्र गरिरहेको भन्दै त्यसको प्रतिरोध गर्न एकताबद्ध हुन अपिल गरे।
प्रचण्डले आफू जनयुद्धदेखि शान्ति प्रक्रिया, संविधानसभा हुँदै अहिलेसम्म जीवित रहेको र नेतृत्व गरिरहेको उल्लेख गर्दै अब फेरि नयाँ क्रान्तिको संकल्पसहित अघि बढ्ने बताएका छन्। उनले “म अहिलेसम्म जीवित रहेँ, एकपटक फेरि क्रान्ति गर्छु” भनी भावुक प्रतिबद्धता व्यक्त गरे।
उनले शान्ति प्रक्रियाका बाँकी कार्यहरू अगाडि बढे पनि त्यसमा चलखेल भइरहेको दाबी गरे र तीव्र निगरानीको खाँचो औंल्याए। साथै, एकता नभएमा अप्ठ्यारो आउने भन्दै सबै वामपन्थी र लोकतान्त्रिक शक्तिहरूलाई संगठित हुन आह्वान गरे।
पूर्वप्रधानमन्त्रीसमेत रहेका प्रचण्डले जनयुद्धलाई राष्ट्रिय दिवसको रूपमा मनाउनु पर्ने भन्दै यस विषयमा अदालतले हस्तक्षेप गर्नु नपर्ने धारणा राखे।
